ҚР Еңбек және халықты әлеуметтік қорғау министрлігі бизнестің әлеуметтік жауапкершілігі бойынша «Парыз» байқауының басталғанын хабарлады.
«Парыз» – халықтың әл-ауқатын одан әрі жақсарту үшін бизнестің қоғам алдындағы корпоративтік әлеуметтік жауапкершілігін қалыптастыруға және сол мәдениетті қолдауға бағытталған байқау.
Ол өңірлік және республикалық екі кезеңнен тұрады. Шағын, орта және ірі бизнес құрылымдары «Үздік әлеуметтік жауапты кәсіпорын», «Еңбекті қорғау саласындағы үздік кәсіпорын», «Үздік ұжымдық шарт», «Экологияға қосқан үлесі үшін» секілді 4 аталым бойынша марапатталады. Сондай-ақ байқау аясында «Жылдың үздік әлеуметтік жобасы» арнайы сыйлығы табысталады.
Байқауға қатысу тегін. Үміткерлер материалдарын қағаз үлгіде және электронды форматта облыстардың, республикалық маңызы бар қалалардың жергілікті атқарушы органдарына жолдайды.
Байқауға қатысты қосымша ақпаратты облыстардың, Астана, Алматы және Шымкент қалаларының жұмыспен қамтуды үйлестіру және әлеуметтік бағдарламалар басқармасынан немесе Еңбек және халықты әлеуметтік қорғау министрлігінің мемлекеттік еңбек инспекциясы комитетінің өңірлік департаменттерінен білуге болады.